ஆளுமையை உயர்த்திக்கொள்ளுங்கள் வெற்றி பின் தொடரும்....
உலகம் மாறிக் கொண்டிருக்கிறது. தொழில்நுட்பம் மாறிக் கொண்டிருக்கிறது. அதன் மதிப்புகளும் மாறிக் கொண்டிருக்கின்றன.
உலக நாடுகள் மேற்கொள்கிற வணிகச் சந்தை நோக்குடைய பொருளாதாரக் கொள்கைகளால் உலகம் மேன்மேலும் போட்டிகள் மிகுந்ததாகவும் சவால்கள் நிறைந்ததாகவும் ஆகிக் கொண்டிருக்கிறது.
புதிய பொருளாதாரம் உருவாக்கும் சவால்களை நாம் சந்திக்கத் தயாராக இருக்கிறோமா? புதிய நூற்றாண்டின் தேவைக்கு ஏற்ப புதிய தலைமுறையினருக்குப் பயிற்சி அளிக்க நம்முடைய கல்வி அமைப்புகள் முடுக்கப்பட்டிருக்கின்றனவா? சில திறமைகளைச் சிறந்த முறையில் கற்று சரியான முறையில் விடாமுயற்சியுடன் கடைப்பிடிக்க வேண்டும். அதன் மூலம் வாழ்க்கையில் சிறப்படையத் தேவையான தன்னம்பிக்கை, உறுதி, பொறுமை உள்ளிட்ட பண்புகளை வளர்க்க முடியும். தங்களிடம் உள்ள ஆக்கபூர்வ பண்புகளைக் கண்டுகொள்ள வேண்டும், அதன் மூலம் பல்வேறு திறமைகளைப் பெறுவதற்கான சாத்தியங்களை எண்ணிப் பார்க்க வேண்டும்.
இலக்கு குறித்து திட்டமிடல், தகவல் தொடர்பு, காலத்தைச் சரிவரத் திட்டமிட்டுப் பயன்படுத்துதல், குழு உணர்வுப் பணி, வளத்தைப் பயன்படுத்தல், இணக்கநயப் பண்பு, முடிவெடுத்தல், நெருக்கடி நேரங்களில் நிர்வகிக்கும் தன்மை, தலைமைப் பொறுப்பு, இண்டர்வியூவை எதிர் கொள்வதற்கான நுட்பங்கள் போன்ற திறமைகளை வளர்த்துக் கொள்ள வேண்டும். குறிப்பிட்ட திறமைகளை மேன்மேலும் நெறிப்படுத்தி வளர்த்துக் கொள்ள வேண்டும்.
காலத்துக்கேற்ற வகையில் அவற்றைப் புதுப்பித்துக் கொள்ள வேண்டும். இளம் பருவத்திலேயே வாழ்க்கையைச் சரிவர நிர்வகிப்பதற்கான பயிற்சிகளைத் தொடங்க வேண்டும். பல்வேறு திறமைகளைக் கற்றுக் கொண்டபின் அவற்றில் தொடர்ந்த பயிற்சி தேவை. திருத்தங்கள், மறுமுறை செய்து பார்த்தல், தவறுகள் மீண்டும் வராமல் தவிர்த்தல் ஆகியவை வெற்றியை நோக்கிச் செல்ல உதவும்.
காலத்திற்கேற்ற சுய ஆய்வும் செல்லும் நெறிமுறைகளில் தேவையான திருத்தங்களும் உறுதியாக வெற்றியின் வாயிலை நோக்கி இட்டுச் செல்லும். உறுதியான முடிவு, கூர்நோக்கு, கண்காணிப்பு ஆகியவை வெற்றிக்கான படிக்கட்டுகள்.
தனிநபர் பண்புகளை மறுசீரமைப்புச் செய்வதற்கான பயிற்சிக்கு எவ்வாறு செல்ல வேண்டும்? சில யோசனைகள்:
* உங்களின் தனிநபர் பண்புகளில் உள்ள நிறை, குறைகளைக் கண்டு கொள்ளுங்கள்.
* உங்கள் நிறைகளைச் சிறக்க முயற்சி செய்யுங்கள்.
* உங்கள் குறைகளைக் கண்டு கொள்ளுங்கள். அதுவே, முன்னேற்றத்துக்கு உதவியாக இருக்கும்.
* வழிகாட்டுதலுக்கும் நெறிப்படுத்துவதற்கும் பழகும் பாங்கியல் அறிவியலாளர்கள், மனிதவள மேம்பாட்டுக் குழுவினர் அல்லது வணிகத் துறை குழுவினரை அணுகலாம்.
* கடுமையான பயிற்சியைத் தொடருங்கள். ஆக்கப்பூர்வமான போக்கினைப் பேணி, சிறப்படையுங்கள்.
* விரைவாக வெற்றியைப் பெற முடியாத நிலையில் பொறுமையாக இருங்கள். பயிற்சியே மனிதனை முழுமையாக்குகிறது.
* மற்றவர்களின் பழகும் பாங்கு அமைவுகளைக் கூர்ந்து நோக்குங்கள். குறைகளைத் தவிர்க்கவும். நிறைகளைப் பேணவும்.
* ஆக்கபூர்வமான போக்குடன் கற்பதற்குத் தயாராக வேண்டும். ஆக்கபூர்வமான பாதையில் செல்ல நீங்களே மனது வைத்துவிட்டீர்கள் என்றால் உங்களது முன்னேற்றத்தை எதுவும் தடுக்க முடியாது. வெற்றி உங்களைப் பின்தொடர்ந்து வரும்.
நன்றி - தினமணி
கருத்துகள் இல்லை:
கருத்துரையிடுக